Executive日記——網民大讚人間有情 熱心車長幫伯伯搵銀包

  香港人鍾意幫人,好有人情味!一位行動不便嘅伯伯,上周六搭由大埔開去西九龍站嘅巴士,途中遺下銀包,幸得兩名車長主動相助,物歸原主。Kelly昨日去大埔見到兩位車長,佢哋都係大埔人,話喺區內開車,等如服務街坊,街坊有事,當然義不容辭,幫手排難解困啦!

  九巴車長林偉俊(阿俊)同楊家樂(阿樂)同樣駕駛271線,來往大埔富亨及西九龍站。阿俊上周六完成一轉車,返回大埔後,見到下層關愛座上有一個銀包,交咗畀站長。阿俊平時喺facebook大埔群組見到有失物主人嘅帖文呼籲,於是即刻喺群組發文,睇吓有冇街坊遺留個銀包,話入面有成個月嘅飲茶錢喎!

  阿樂當日接阿俊嘅下一班車,駛到去佐敦德成街,遇上一名伯伯求助,話想去西九總站搵銀包,佢當時身無分文,阿樂二話不說就免費載佢到總站,帶佢去搵站長,但銀包不在那裏。放工返到屋企,阿樂上網見到阿俊嘅帖文留言,先知道個伯伯嘅屋企人去咗富亨總站攞番個銀包,才鬆一口氣。

  阿俊同阿樂分別入職三年半同九個月,今次助人經歷對佢地嚟講都幾難忘,估唔到獲好多網民讚。阿俊話,港人好有人情味,特別係大埔人,佢爸爸試過唔見嘢,結果都成功搵返。阿樂亦指,由細到大都搭271線出去玩,大個載返街坊出街,特別有感情!

Kelly Chu


hd