Executive日記——昂坪360員工山道執垃圾 籲愛護環境

  無論上周末天氣有幾炎熱,都無阻昂坪360一班同事去行山,唔係玩,而係去纜車對下條山道執垃圾,Kelly亦加入做一天義工咁多,曬到滿頭大汗,但執到一袋仔垃圾,出咗一丁點力保護郊野環境,好開心,也希望大家做個「高汁」嘅行山客,自己垃圾自己帶回家。

  上周末三十幾度,熱到爆炸,但昂坪360嘅同事Andy、Sharon同Millie一於無有怕,帶埋幾名心口同樣掛住個勇字嘅義工,一齊由東涌出發,沿住纜車下面嘅山路上山。呢次任務好重大,就係檢視下行山客有冇留低垃圾,一見到就夾走佢哋。

  大家做足準備,包括戴帽、搽足太陽油,當然唔少得要戴口罩,Andy仲要負擔做「運水」支援,一個人帶幾樽水,等各義工無後顧之憂。講番行動結果,令人都幾開心,因為大家預計疫情之下多咗人staycation(在自己國家旅行),行山係其中一個受歡迎嘅活動,可能道上會多咗垃圾,點知垃圾唔算多,只執到一兩個空膠樽、一啲紙巾和一啲煙頭,Kelly覺得OK,證明香港人好高質,但就要喺呢度呼籲大家唔好亂掉煙頭,怕隨時引起山火就大件事!

Kelly Chu


hd