Executive日記——披頭散髮 長櫈熟睡 「貞子」 深夜現身中環站

  Kelly近期夜蒲有「奇」遇,搭港鐵喺中環站落車,一而再、再而三喺同一個位遇到一個長髮披臉嘅人,佢坐喺一張櫈上低頭酣睡,遠睇幾似日本驚嚇電影中嘅「貞子」。

  Kelly同呢名長髮者(頭髮太長,無法辦認是男是女)首次相遇,係喺六月十七日深夜十一點四十五分,當時小妹坐港島線列車往中環站,由車頭車廂落車,一上月台就見到「貞子」坐喺一張長櫈上,佢個頭垂得好低,長髮遮臉,當時四周好少乘客,大家都對佢投以奇異嘅眼光。

  到咗六月二十五日同一時間,Kelly喺中環站落車又喺同一地點再遇「貞子」,佢坐喺同一位置,長髮遮面,睡得香甜。直至前晚七月六日同一時間地點,小妹第三次遇上佢,又係一個人獨睡。

  港鐵回應Kelly,話一向致力為乘客提供舒適嘅乘車環境,若職員發現乘客疑似不適,會上前查詢同協助。若發現乘客只係睡覺,會提醒佢不要錯過列車,以免耽誤行程。

Kelly Chu


hd