Executive日記——清潔龍抽水抽着火水 貼水着「蚊」女被舉報!

  食環署宣傳大使清潔龍阿德時不時喺facebook「抽水」,好受網民LIKE。阿德前日發文,內有一張性感泳裝少女相,附上挑逗字句,「我叫Aedes albopictus伊伊」、「要約直接見面嗎?」網民大驚,以為被色情網「hack」,按入連結,先知係登革熱白紋伊蚊嘅資訊,網民邊笑邊讚抽得靚。

  Kelly見「伊伊」穿著可愛泳裝,輕咬太陽眼鏡框,好sexy。帖文附連結,但無人敢按入去,皆因帖文還有一段文字:「您好,我叫Aedes albopictus伊伊,我住在一個草地旁邊。 要約直接見面嗎?輕輕咬你耳朵,莎朗嘿喲,快看我的調皮視頻」,好挑逗噃,最後揭開謎底,原來內文係登革熱資訊,而Aedes albopictus係白紋伊蚊嘅學名,小妹笑唔停。

  但帖文似乎「玩大咗」,阿德昨天再發文話,帖文被facebook用「違反裸露或性行為規定」移除,變成真「滅蚊」,「係咪有人Report我啊?張相只係我為咗出 Post上網買嘅一張模特兒相,而模特兒係着住泳衣㗎,點解會係『裸露及色情』呀?冤枉啊,我都係想提大家要預防蚊患啫!」搞到網民哭笑不得。

Kelly Chu


hd