Executive日記——做一日「救火勇士」 拯救走失啤啤熊 三歲病童圓消防英雄夢

  疫情下,好多志願服務受阻,好似致力為病童達成心願嘅「願望成真基金」,工作遇上更多困難,但無阻基金團隊奮力為一眾病童圓夢。最新一宗受惠個案,係患橫紋肌肉瘤、三歲嘅謙謙,佢好鍾意消防員㗎。基金好有心,搵來啟德消防局,合力為謙謙安排咗一日出更,佢仲好英勇咁拯救咗一隻啤啤熊O添。

  謙謙每次聽到消防車嘅響號,就會開心到眼仔碌碌,每次見到消防車駛過,就識得好興奮咁講:「Fire Truck!Fire Truck!」願望成真基金諗,如果佢可以坐上消防車執勤,一定會好開心。早前謙謙病情穩定,基金即刻行動,得到啟德消防局支持,謙謙喺父母陪伴下,昂步仰首踏入消防局,喺消防哥哥協助下,穿上消醒目嘅消防員制服,一齊步操,然後坐上消防車,謙謙開心到笑咗出嚟。但真正考驗在後頭——有一隻啤啤熊走失咗,謙謙喺消防局搜尋,終於拯救番佢,不辱使命。Kelly好感動,多謝一班好有心嘅啟德防消員,小妹也為謙謙同其他病童打氣,大家努力面對以後嘅療程,要驅走病魔呀。

Kelly Chu


hd