Executive日記——康文署:應居民要求補光 榕樹灣球場禁打波照開大燈

  Kelly幾日前去南丫島行山,發現榕樹灣嘅七人硬地足球場,去到深夜仍然開着球場大光燈,小妹好奇,明明疫情下康文署關閉所有球場,入面又無人踢波,加上四周仲有街燈,點解仲開大光燈咁浪費電力呢?康文署回應話,喺今年六月時接獲地區人士意見,話球場旁榕樹灣廣場路嘅街燈光度不足,影響夜間出入安全,所以繼續開着球場燈咁話。

  榕樹灣無人用嘅球場,晚晚照開大光燈,真係好奇怪。但康文署話實地視察過,再考慮埋居民嘅需要,酌情開啟足球場內嘅泛光燈,方便居民喎。喺平衡居民需要同環境保護嘅前提下,署方調整咗泛光燈開啟數量,喺晚上只開啟位於榕樹灣大街一方嘅兩組泛光燈設施。

  此外,康文署提醒,至上月十五日起已暫停開放轄下免費康樂設施,署方會巡察轄下場地,若喺巡察期間發現聚集人數多於當時「限聚令」上限,職員會上前勸諭。若勸喻不成功或重犯,就會採取執法行動。



Kelly Chu


hd