Executive日記——呼籲勿現病徵才做檢測 鄧達智擊退病魔談心得

  著名時裝設計師鄧達智(William)上月底確診新冠肺炎,留醫一星期,身體出現抗體,昨天出院!一班不斷為佢打氣嘅朋友都好開心,William拍片多謝醫護人員嘅照顧,又感激親友嘅支持,話今次係一個好難得嘅經驗,好開心可以返屋企,仲以過來人身份話︰「大家一定要戴口罩,若有機會受感染,唔好有病徵先去驗,因為病毒入肺先知就太遲。」

  William確診四天後獲安排留醫聯合醫院,治療期間打針,不斷發燒發冷,嚴重副作用係燒足四天,令佢迷迷糊糊,幾日後停藥,昨日出院,佢覺得好快,醫生指佢係冇病徵嘅感染,經過今次之後,佢話大家要更加小心,若果接觸過確診者,不要等有病徵先去驗,若病毒入肺就太遲,即使並非大年紀,病毒唔奪命但好辛苦,佢住嘅雙人病房就有人咳到死去活來,自己亦瘦咗。

  其實Kelly認識嘅William,一向好注重養生,佢就教康復者健肺小貼士:「醫生介紹吹氣球,唔好谷,慢慢吹,每日吹三至五個氣球,使康復者嘅肺部柔軟,循序漸進慢慢好番,係小意見,大家可以參考吓。」

  William又話,留院期間,最開心係有好多老朋友、屋企人同親戚,當中有比較少交往及少出現嘅,都傳短訊鼓勵佢。佢感謝醫護照顧周到,今次係一個好難得嘅經驗。Kelly見到William精神唔錯,希望佢休息好之後重投工作,快啲推出新書嘅下集啦!

Kelly Chu


hd