Executive日記——《東周刊》分享投資心得 蔡子強睇中黃金升市賺到笑

  睇雜誌,用心分析,可以致富!Kelly講緊中文大學政治學者蔡子強,佢鍾意睇The Economist(《經濟學人》),其中一期分析疫情後各國嘅債務,觸動佢行動起來去買金,結果金價大升,佢好開心話俾Kelly聽,升咗三成咁多,穩賺數以十萬蚊喎,佢仲將投資嘅經驗喺五月份一期《東周刊》同大家分享。

         蔡子強好勤力,喺中大教書、研究政治,公餘寫書又為傳媒寫專欄,得閒又投資。佢同小妹講,喺五月睇咗《經濟學人》,封面大字標題係講疫情後債市,內容大意講到各國不斷量化寬鬆,狂印銀紙,搞到長期低息環境,各國自然唔想債市上升,希望以溫和通脹蠶食咗啲債務,期間中美嘅角力日益嚴重,觸發到蔡子強諗喺呢個時勢,資產一定會升值,但佢覺得股市波動,入樓市成本又重,於是就向黃金埋手,密密咁入,結果睇中市,金價大升,賺到笑。

         蔡子強話,持金嘅價值已經漲咗三成咁多,唔會沽住,因為美國仍然不斷推救市方案,不斷印銀紙。佢將呢次投資經驗喺今期《東周刊》同大家分享,笑言第一次寫投資就中,仲話請小妹食一餐O添。

                                

Kelly Chu


hd