Executive日記——股價低過11年前海嘯價 青姐評滙豐唔再喊 叫股民要狠心割愛

  股市波動,滙豐股價疲弱,一度跌低過十一年前嘅金融海嘯價,昨天收報三十二點八。想當年獨立股評人胡孟青(青姐)喺財經節目為滙豐跌至三十三蚊喊咗出嚟,今時今日睇番五號仔嘅表現,青姐今天見滙豐咁殘,冇再喊了,仲同Kelly講,料滙豐未見底,再三呼籲大家「唔好同股票談戀愛」,要狠心啲割愛,搵過其他收息股好過咁話。

        Kelly安坐家中抗疫,不時留意一下股市嘅走勢。滙控股價疲弱,唔少持有者「財息」雙失。睇番○九年輕姐為滙控急挫至三十三元喺鏡頭面前落淚,但佢昨日同Kelly講,銀行業喺長期零息環境,確係好難支持落去,加上滙控公佈咗中期業績,壞帳由去年底嘅八十多億美元升至六月底嘅一百三十多億,撥備大增,自己唔再睇好佢之後嘅價位。

  青姐當年同傳媒講,情緒失控係為咗滙控股民難過,「見到唔少公公、婆婆輸得咁厲害,一時感觸喊咗出嚟」,但見到滙控今年「連息都唔派」,反問番小妹:「仲想點呀?」佢話,如果有上一輩有留落一啲五號仔嘅話,「咁多年收息都收番晒(成本價)啦」,再次勸喻大家「唔好同股票談戀愛」,反而可以考慮其他公用股博收息喎,謝謝青姐嘅分析。

Kelly Chu


hd