Executive日記——「蔡神仙」九年來首次開鑼戰贏馬 「凌駕」 爆冷報捷 廖長江風騷代攞獎

  沙田馬季開鑼日前天圓滿結束,人稱「蔡神仙」嘅十一屆練馬師蔡約翰一改慢熱作風,九年來第一次喺開鑼戰贏馬,而且一贏就贏足兩場,其中開齋頭馬「凌駕」嘅來頭尤其厲害,皆因馬主「誠意團體」成員全部非富則貴,經理人係李國能同廖長江,成員包括榮智健同其公子千金,仲有許晉亨、陳文生同名醫生李國棟。如果唔係疫情下馬會限制入場人數,呢批猛人齊集凱旋門拉頭馬,場面會勁過不少城中盛事。

        呢次「凌駕」報捷,Kelly只見身兼馬會董事嘅廖長江落沙圈做代表,贏完馬先後同蔡約翰及騎師莫雷拉合照。但按「凌駕」嘅表現,相信當疫情一過,佢再次報捷嘅話,沙圈上一幅「齊腳」猛人拉頭馬相,乃是指日可待,相信到時會盛況空前。

        馬圈朋友話,「凌駕」年紀尚輕,出道以來七戰只一次不入前四名,今仗身負頂磅仍爆出十三倍冷門完成跨季連贏,姿態更遠比上季成大熱門開齋時輕鬆得多,明顯大把在手。話時話,「凌駕」嘅年紀正合乎參加今年三場四歲馬系列大賽,前天贏完增至六十六分,如果繼續進步,隨時連打吡都有胡叫!



Kelly Chu


hd