Executive日記——「您哋俾我除衫搵食啦!」 夏蕙姨拍性感短片 控訴抗疫基金冇支援

  演藝界等咗多個月,先至等到政府前日推出第三輪抗疫基金,支援下演藝界人士,應該係好事,但黃夏蕙好唔like,仲拍短片放上網,話︰「您哋俾我除衫搵食啦!」仲話︰「我唔願做人啦!」做乜搞到咁激!

        夏蕙姨喺短片裏面,用特別嘅軟件效果,將自己個頭Key咗落一啲身材玲瓏浮凸嘅外地女星身上(有啲仲係幾肥美),跳晒勁舞好吸睛。點解要出性感短片呢?原來夏蕙姨好唔高興第三輪抗疫基金,投訴話︰「六十五歲班老友記,喺今次抗疫基金中乜春都無!好人好姐,諗住自力更生!六十五歲都出嚟做嘢,唔好變咗年輕人嘅負累!又唔想成為社會嘅負擔,唔去攞綜援,點知就係得個桔!」

         夏蕙姨跟住講,有好多老人家只可以用勞力去換取人工,過咗六十五歲又唔可以供強積金,僱主攞唔到政府嘅保就業資助,第一個梗係炒班老人家啦,跟住佢講到自己︰「我完全冇計啦!只好袒胸露臂出嚟表演賺啲生活費,你哋唔好怨我虐待您哋嘅眼睛!呢個係社會嘅錯,唔係我嘅錯!您哋俾我除衫搵食啦!」

Kelly Chu


hd