Executive日記——旅發局教KOL整美食 一解東南亞「思港」情

  疫情重創國際旅遊,訪港旅客大跌,世界各地幾時開關無人知,但旅發局就無停過宣傳香港,維持香港嘅曝光,近排推出名為「一百個想念香港的理由」嘅網上推廣,教東南亞地區嘅KOL整燒賣、蛋撻等地道美食,吸引好多人like,增加佢哋日後訪港意欲。

  本港地道美食對東南亞遊客有好大吸引力,旅發局就發揮創意,設計一套「港式小食懶人包」,齊備製作香港街頭小食三寶: 燒賣、魚蛋同缽仔糕嘅新鮮食材同簡易食譜,直送新加坡、台灣、菲律賓等地嘅KOL,令佢們無法來港,都可以喺屋企試整港式美食,一解「思港」之情。

  各KOL仲將製作小食嘅過程拍成短片,上載到社交平台,分享畀一眾followers。各地網民都反應熱烈,紛紛畀like,短短兩星期,網上推廣喺東南亞地區接觸到五千萬人次。

  來自新加坡嘅美女KOL Stella謝慧嫻(見圖),就嘗試整燒賣同咖喱魚蛋等,整得似模似樣,佢亦食得好開心。另外,旅發局仲推出潮玩Instagram AR互動濾鏡,等網民分享佢哋最掛住嘅香港美食同打卡勝地。

  Kelly都希望疫情早日消散,大家想去邊就去邊,亦歡迎旅客到訪香港享用美食。

Kelly Chu


hd