Executive日記——頭條開live講解新股市場 股壇名家袋錢入你袋

  疫情下,好多人變咗「宅男」同「宅女」,Kelly都成為「宅女」之一,家中主要活動,當然係不停上網啦!上周六,Kelly留喺屋企都有人袋錢入我個袋,因為睇咗「頭條開live」,當中講題係「新經濟股」,請來股壇名家分享投資心得,包括寶鉅證券嘅黃敏碩同埋Kelly偶像「古天后」,嘩!原來《頭條》專欄名家「古天后」真人咁靚女!佢仲推介咗兩隻心水股俾觀眾O添!

  黃敏碩講解新股市場,話明嚟緊隻螞蟻科技係首選,可以重錘出擊。至於半新股,佢話隻京東(9618)潛力巨大,可以吼。至於「古天后」就大談新股濟股投資價值,講到點睇美團點評(3690)及小米(1810)投資價值。原來唔應該單純用傳統嘅PE同PB呢啲準則衡量,因為新經濟股係輕資產、高增長股,把尺要唔同,Kelly聽完開咗竅,咁你話係咪袋錢入我袋呢?

古天后有心水推介

  「古天后」仲醒咗兩隻心水股俾觀眾,一隻係思摩爾(6969),另一隻係祖龍娛樂(9990),至於點解推介,不如大家自己上facebook,然後click入去「頭條開live」睇啦,o依家已有過萬瀏覽,好多股民追睇。

  據Kelly所知,「頭條開live」會繼續有多元化節目陸續推出,下星期六講買二手車,又係開正Kelly條路,咁Kelly下星期六就會乖乖留家睇「頭條開live」!

Kelly Chu


hd