Executive日記——滙豐股價跌到25年低位 銅獅被淋油兼火燒 李丞責 : 建水池化解

  滙豐銀行成為中美角力嘅磨心,股價係咁跌,昨天收報二十八個七,唔少小股東欲哭無淚。有口痕友話,早知獅子銀行會唔掂,點解呢?原來滙豐前面嘅銅獅子喺今年元旦日示威中,先被人淋紅漆,再被人淋易燃液體火燒,獅子內傷,股價點會好呢!Kelly問過風水大師李丞責(小圖)有乜化解方法,佢話獅子係滙豐嘅鎮店吉祥物,受破壞之後,銀行應該快啲修補,並喺獅子前建個水池,摘吉日解封開光。

        滙豐傳被中國商務部列入不可靠實體清單,股價呢幾日係咁尋底,跌穿三十蚊,失守○九年嘅海嘯價,昨天收市報二十八個七,創逾二十五年低位。網上有不少小股東均大吐苦水,有人直言︰「隻獅子俾人燒完就無運行」。Kelly持有少少滙豐,收息機會冇咗,唯有耐心等佢好番,但好多股評家都話依家唔係撈底嘅時機,大家小心啦。

        李丞責就分析,滙豐原來嘅風水佈局,喺放兩隻銅獅子喺門前,前面臨海,但隨著填海同城市發展,獅子不再近海,加上滙豐標誌用紅色,今年屬火,紅色代表病疫,而金融嘅金色又與呼吸有關,滙豐難免受影響。佢建議滙豐快啲修補番兩隻銅獅子,最好要喺前面建一小水池,回復原來臨海嘅風水佈局,仲要揀吉日解封開光。Kelly覺得搞好風水好重要,希望快啲進行,小股東一定like。

Kelly Chu


hd