Executive日記——單車徑打通新界東西 沿途好風光

  秋意漸濃,市民可以去全新嘅單車徑舒展身心。Kelly發現,總長六十公里、貫通新界東西嘅屯門至馬鞍山的單車徑主幹線,已經全面開放。連接元朗至上水嘅十一公里新路段今日正式開放,由屯門直踩去沙田不是夢。新單車徑途經元朗錦田河、新田一帶和上水塱原濕地等,啱晒一家大細去「打卡」暢遊一日。

  土木工程拓展署話,連接元朗至上水嘅單車徑今日正式開放,標誌着總長六十公里、由屯門至馬鞍山嘅單車徑主幹線已經完成。如果小妹以時速十公里速度計算,踩晒成條「屯馬線」單車徑,大約就要六個鐘。

  新單車徑沿途有唔少風景優美嘅景點,例如元朗錦田河和上水塱原濕地,亦會途經新田一帶,區內又有多個文化景點和配套設施,如單車租賃站、小食亭和洗手間等,貼心地照顧單車友嘅需要。

  至於全長二十二公里嘅荃灣至屯門的主幹線,政府話荃灣青荃橋至灣景花園嘅一段興建中,全長兩公里,預計明年年初開放,荃灣友要再耐心等多陣啦。

Kelly Chu


hd