Executive日記——網上一呼百應 物資堆滿倉庫 有心人捐食物 助鮮魚行基層童

  疫情下,人間有愛。喺唔少基層收入大減下,佢哋連平日食用都有困難。有「基層名校」之稱嘅鮮魚行學校,一直有向學童送食物,近日有心人致電校方,問有乜可以幫手,校長透露唔少基層家長失業,希望公眾捐助口罩同食物,有心人喺網絡發放校長嘅呼籲,引起一呼百應,校方幾日內收到大批罐頭等物資,可以放滿一個小倉庫,Kelly聽到都好感動。

  大角咀鮮魚行學校校長施志勁對Kelly話,校方一直設「交齊功課得食物」獎勵計劃,當學生每星期交齊功課,就可獲發包括罐頭嘅食物包,對佢同家人作少少幫助,同時藉機培養學生嘅責任心。

        喺上星期初,一名善心人打去學校查詢有咩可以幫忙,施校長就透露疫情期間有唔少家長失業,希望市民可以捐贈口罩同罐頭等物資。施校長無諗過呢位有心人會喺網上轉述佢嘅要求,然後引起瘋傳,公眾一呼百應,校方短短幾日就收到大量物資,放滿一個小倉庫,更有其他市民打去學校問候。

        施校長話,好多謝咁多有心人,但學校空間有限,唔想突然有太多物資,最後浪費,希望大家捐物資到其他慈善機構,佢話社會上仲有好多人士需要關注同幫助!咁大家多啲留意其他慈善機構嘅呼籲,向有需要嘅人伸出援手。

Kelly Chu


hd