Executive日記——葉Sir:吃巴丁魚 水哥:胡椒蟹正斗 美食旅遊達人教路玩盡獅城

  大家坐咗咁耐疫監,終於有望飛出香港啦!香港同新加坡就建立「航空旅遊氣泡」達成原則性協議,兩地政府未來數星期將敲定各項安排,咁Kelly就可以飛去獅城吃喝玩樂,昨日興奮到四圍問人有乜好介紹。食評家葉Sir葉澍堃即刻醒小妹,話「華廳」嘅蒸巴丁魚嘅肥美魚腩,令人一食難忘,一定要食。另一位旅遊達人紀曉華(Walter,見圖)教路,當地「龍記」嘅胡椒蟹,不容錯過。

        吃盡天下美食嘅葉Sir話,新加坡一開關,佢想去麥士威熟食中心(Maxwell Food Court)食「天天」雞飯,佢哋嘅雞飯,天下聞名,好味到極,雖香港近年開咗分店,但始終本店好食好多。「天天」每日賣二百多隻雞,飯用薑、蒜、乾葱、斑蘭葉同雞油炒過,再用雞湯來煮,香而不太油,Kelly諗一諗都流晒口水。

  喺獅城除咗雞飯、叻沙同肉骨茶,亦要試特別嘅蒸魚。葉Sir話,佢同石禮謙議員最鍾意去新加坡烏節酒店(Orchard Hotel)二樓嘅「華廳」,必點清蒸巴丁魚。據聞,「華廳」採用嘅巴丁魚食水果大,魚腩肥美芳香,味道勝過「海魚」,用魚汁撈熱騰騰嘅白飯,比魚翅撈飯仲好味!每一次石議員都搶住要食最肥個件腩。

  而Walter就話,去新加坡點可以唔食胡椒蟹,但當地好多餐廳都標高個價,廚師水準亦參差。佢醒大家必食貼士,就係去「龍記」歎招牌胡椒蟹同螃蟹米粉,形容非常有水準,好多當地人都幫襯!

Kelly Chu


hd