Executive日記——昂坪360夥願望成真基金 搞創作比賽助病童圓夢

  於疫情下,兒童醫院限制外人探訪,義工服務停頓,「願望成真基金」原本會喺街上賣旗籌款,都要改為網上進行,大大影響善款數字。

  Kelly收到風,原本參與賣旗活動嘅昂坪360立即於兩星期內,籌備咗「利是封創作比賽」,仲得到福建中學附屬學校徐校長大力支持,活動推出一日就聯繫到三十幾所小學參加比賽,校長們更出錢出力慷慨解囊。另外,潮牌FILA亦會贊助一千五百份禮物。小妹覺得大家都好有善心。

  小妹仲知道,大約有二百個病重兒童等待完成心願,急需大家給力,鼓勵佢哋抵抗病魔。如果參加比賽,二十蚊報名費會全數撥捐「願望成真基金」,昂坪360亦會捐款,報名愈多,捐款就愈多。作品仲有機會印刷成利是封,送畀病童家庭,將新年祝福廣傳開去。想知道比賽詳情,可以去「360義工隊」fb專頁了解更多。

Kelly Chu


hd