Executive日記——《再說皇都》專家研討 回味北角舊日情

  屹立北角六十八年、屬一級歷史建築物嘅皇都戲院,早前由新世界發展透過強拍投得。為咗令公眾能夠重新認識皇都戲院嘅珍貴歷史,以及北角嘅今昔點滴,由新世界執行副主席兼行政總裁鄭志剛成立嘅非牟利機構「Culture for Tomorrow」,將舉辦《再說皇都》網上研討會,邀請不同範疇嘅專家,細訴北角O依個曾有「小上海」之稱嘅社區種種軼事,就如何承傳皇都戲院嘅精髓集思廣益。

  首場網上研討會主題為「北角的發展與香港流行文化」,於下周二晚上七點半舉行。頭炮嘉賓為香港歷史叢書作者兼「香港舊照片」facebook專頁創辦人余震宇(Jacky),以及嶺南大學中文系講師蕭欣浩博士。屆時,Jacky會透過一幀幀珍貴舊照片,帶領參加者重溫五、六十年代北角嘅時尚浮華。至於對香港飲食文化素有研究嘅蕭欣浩博士,則會從北角過去嘅飲食誌談起,分享香港中西文化嘅融合。

  研討會主持為活現香港創辦人陳智遠,費用全免,有興趣嘅市民可透過https://bit.ly/3ofCu2z作網上登記。

Kelly Chu


hd