Executive日記——「PR On Call 25小時」 助培育年輕公關人才

  一場世紀疫情,唔少行業裁員,改變咗勞動市場生態。為咗拓展畢業生出路同培訓生力軍,公共關係專業人員協會(PRPA)趁今年二十五周年,舉辦「PR On Call 25小時計劃」,為八間本地大學同大專院校有意發展公關事業嘅二十二位學生作師友配對,透過二十五小時嘅影子工作機會,助學生了解公關嘅實際職能同工作情況,培育年輕公關人才。今次參與計劃嘅公司有十一間,當中有國際同本地公關公司、上市公司同非牟利機構。Kelly覺得商界好有心。

  日前該協會喺香港高等教育科技學院(THEi)舉辦跨校職訓講座,邀請咗六位行內專業人士分享公關路向及發展。協會會長尹美玉(Ruby)話:「希望計劃能幫助學生在踏入職場前最後一年,實際體驗公關行業的多方面工作。」參加計劃嘅學生經學校推薦同面試篩選,過程嚴謹。二十二位入選嘅學生來自中大、城大、恒大、浸大、理大、理大專業進修學院、樹仁大學同THEi。

Kelly Chu


hd