Executive日記——方健儀豪購安樂窩 源於母校情意結

  前電視新聞主播方健儀轉做全職KOL多年,佢喺行內出名精打細算,就算情人節都唔使老公送花,話避免浪費喎,佢對Kelly話,近日疫情好番啲,接job多咗。佢近日就喺fb透露,期望建立一個安樂窩,原來佢早前斥資逾一千八百萬元,購入柏傲莊一個三房單位,除咗夠豪之外,仲同佢嘅母校情意結有關。

  根據土地註冊處顯示,方健儀購入柏傲莊一個面積七百五十四平方呎嘅單位,成交呎價二萬四千五百三十二元,個單位有三房,向東北,並可望及沙田城門河的景色。方健儀喺fb透露自己已經建立咗一個安樂窩,原來佢係沙田老街坊,三十年前喺區內名校沙田官立中學讀書,但學校遠離屋企,媽咪曾一度反對佢入讀沙官,但方健儀無懼母親嘅反對,堅持入讀沙官,結果順利升學,造就事業有成。三十年後,佢憑自己努力購入柏傲莊單位,期望入伙後,「每天打開窗戶看到母校,一個讓我打好根基的地方。」

  Kelly八卦到,方健儀之前參觀過新世界Adrian Cheng旗下嘅樓盤,感覺設計及主題獨特,所以一直心儀新盤柏傲莊,有園林花海還有日式梯田,即使疫情期間未能外遊,亦可在屋苑享受心曠神怡嘅環境咁話喎。

Kelly Chu


hd