Executive日記——「旅遊氣泡」告吹 汽球裝飾爆破收場

  香港突然爆發第四波疫情,香港同新加坡互通嘅「旅遊氣泡」原定昨日啟動,但臨門一腳煞停,延後至少兩個星期。機管局原有慶祝活動亦要暫停,成百個原本用作擺設嘅氣球,畀工作人員全部戳破,變咗垃圾,Kelly見到都覺得可惜。

  荃灣區區議員譚凱邦噚日喺facebook轉載三張網上圖片,話機場原本有儀式,慶祝「旅遊氣泡」計劃第一日實施,但估唔到計劃「難產」,本來準備好嘅氣球擺設「用唔着,整爆晒」。據其中一張相可以見到,機場客運廊內原本擺咗一個拱門,用過百個唔同大細嘅金、銀、黃氣球紥成,喺頂部更掛住寫有「香港新加坡航空旅遊氣泡」嘅英文字牌,印住機管局標誌。

  有工作人員將呢個氣球拱門拆咗,之後氣球散到一地都係,畀人逐一整爆,真係可惜!

Kelly Chu


hd