Executive日記——富途證券逆市身價急升 林寶玩crossover大力支持

  Kelly同朋友近期過海,留意到三條過海隧道都被富途證券嘅廣告包攬,呢間全線上證券公司今年喺香港冒起得相當快,公司上星期出第三季業績,單季淨賺四億幾,按年勁升十六倍,堪稱逆市奇葩。

  公司賺大錢,自然身價急升,連林寶堅尼都同富途大玩crossover,一連兩日喺《頭條日報》賣頭版廣告。兩家公司相互捧場,連林寶都出面支持,富途實力可見一斑。事實上,富途營銷一向出位,由一世免佣到早前帶頭豁免螞蟻IPO嘅手續費同利息費,大膽舉動經常讓市場嘩然,但公司交出漂亮業績,可見市場對富途進取嘅經營之道相當受落。

Kelly Chu


hd