Executive日記——繽紛冬日巡禮登場 聖誕小鎮移師網上

  天氣愈凍就愈有節慶氣氛,但疫情下大家要準備過不一樣嘅聖誕啦!旅發局即日起至明年一月三日舉行嘅「香港繽紛冬日巡禮」,製作咗「聖誕小鎮虛擬之旅」網站,除咗會聽到網絡紅人「蕭叔叔」嘅靚聲外,仲可以學整手工藝品,Kelly覺得真係啱晒一家大細參加!

  旅發局話因為要保持社交距離,中環皇后像廣場唔會擺放聖誕樹,但會推出虛擬版嘅聖誕小鎮,讓大家留家感受濃厚節日氣氛。只要登入「聖誕小鎮虛擬之旅」網址(https://hkwfvirtualtour.com),就會聽到由教英文出晒名嘅「蕭叔叔」聲音導航,佢會用廣東話和英語講聖誕故事,大家可以邊玩邊學英文。

  點擊進入「聖誕小鎮」內嘅「奇妙手作大街」,就可以瀏覽教學短片,學習製作聖誕手工藝品,包括立體聖誕卡、聖誕花環等。仲可以免費下載由四位著名本地插畫家設計嘅WhatsApp貼圖,可愛聖誕造型配以生動潮語,啱晒send畀朋友。

  疫情所限,旅發局取消今年維港兩岸除夕煙火倒數活動,同埋明年新春唔會有花車巡遊,但構思一個結合「線上+線下」活動。「香港美酒佳餚巡禮」運用呢個模式反應不俗,「網上大師班」便累積有近五十萬人次觀看,外賣套餐銷量更較預期理想。

Kelly Chu


hd