Executive日記——除夕覓得合適器官 感激捐贈者 好媽媽換心成功 新年獲新生

  新年新景象,對需要換心續命嘅好媽媽陳麗娟June嚟講,更加係重獲新生命。Kelly睇到佢嗰仔喺fb專頁透露喜訊,話阿媽換心成功啦!Kelly都替佢哋開心。

  陳麗娟嘅丈夫喺十多年前去世,自此獨力撫養孩子成人。不幸喺三年前患上心肌炎,去年仲惡化,心臟嚴重衰竭要換心救命。幸運降臨呢位好媽媽,去年將盡嘅十二月三十日晚接獲通知可換心,移植手術安排喺除夕早上,到下午順利完成,佢喺一月一日元旦早上甦醒!

  佢兒子Arthur昨日喺fb大講心路歷程,話等到一顆合適心臟實在係唔容易嘅事,捐贈器官嘅家庭面對失去家人,悲痛之餘仍願意捐出器官,讓佢媽媽得以延續生命,感激之情溢於言表。佢鼓勵更多人願意簽署器官捐贈卡。

  Kelly睇番醫管局資料,至去年十二月有二千五百人等緊好心人捐贈器官續命,希望有更多病人都似呢位好媽媽咁好彩啦。

Kelly Chu


hd