Executive日記——海上漂流三周 民眾憂播毒 本港檢疫手環「游」 咗去花蓮

  疫情下,各國封關,香港人連鄰近嘅台灣都去唔到,但奇怪嘅係,與香港有關嘅抗疫物品竟然去到台灣,仲係循水路「游」去,佢就係香港嘅檢疫手環,點解漂洋過海去到咁遠,真係好神奇,反映有人冇公德心亂咁掉棄垃圾。

  台灣媒體報道,有環保義工喺本周一於花蓮七星潭調查海洋廢物時,發現一條印有「居安抗疫(StayHomeSafe)」嘅手環,根據表帶上嘅藤壺生物,推測手環喺海上漂流時間約三星期。

  消息傳開後,有民眾擔心海漂來嘅電子手環是否會殘留病毒,但當地嘅醫生指出,手環經居家檢疫後,再經海上漂流三周,病毒殘留可能性不大,不會有感染風險。

  香港特區政府資訊科技總監辦公室就呢單新聞回覆傳媒查詢時話,大部份電子手環均為一次性電子手環,配合「居安抗疫」流動應用程式使用,受檢疫人士完成檢疫期後,可自行解除流動應用程式及剪下手環,免卻回收安排,電子手環並非醫學廢料,剪下手環後可自行棄掉,而手環主要物料為塑膠。

        Kelly就呼籲大家唔好亂掉與抗疫有關嘅物資,即使冇病毒,但膠質好難降解,始終對環境有害。

Kelly Chu


hd