Executive日記——沙田建配水庫 滿足沖廁需求

  深水埗主教山仿古羅馬拱柱水庫出土,引起公眾關注如何保育之餘,亦令好多人對水庫基建產生興趣,原來香港供水系統好龐大㗎。據關心水務設施嘅朋友話,當局計劃係沙田建一個新配水庫,原來係為咗滿足沙田人口上升所需要嘅沖廁水。

  政府向城規會申請興建呢個新配水庫,選址喺臨近水泉澳邨嘅博泉街旁邊,地處較高,已做咗景觀、視覺評估、生態影響評估及土力規劃等,又唔需要建新路道,唯一問題係處於綠化地帶,所以要城規會考慮。

  不過,呢個配水庫都對民生好重要,原來依家沙田水泉澳一帶嘅民居係用緊淡水沖廁,估計區內人口會上升,對沖廁水需要將大增,故此建新配水庫係為咗改用海水沖廁,慳番啲珍貴嘅淡水,都係好重要,所以Kelly都希望呢個新配水庫早日建成就好。

Kelly Chu


hd