Executive日記——市民挺「港產花」 湧入農場入貨

  食衞局話煞停年宵花場,被花農鬧爆,市民嬲爆,終於轉軚又話復辦番,但班花農已經被官員舞到氹氹轉,因為之前投得幾多個檔位都好,最後只得番一至三個,好難做。但一失總有一得,好多市民聽到花農經營困難,主動去農場買年花,令到啲花農好開心,原來唔少港人挺番港產年花。

  有「蘭花大王」之稱嘅楊小龍,對政府一時停搞年宵一時又重辦,感到無所適從。佢原本喺維園投到十四個花檔,現在唔知當局縮減年宵規模之後,得番幾多個,都有啲擔心大批蘭花去貨問題。但過去一個周末出現咗轉機,多咗市民揸車入去佢位於八鄉錦上路嘅蘭花園,直接選購,令佢感到香港人好有心,知道花農有難,就主動出手相助,「十個入嚟買花嘅人,三個係以前未見過嘅生客!」,而且多咗後生仔,令楊小龍好開心嘅,除咗客人買蘭花,仲好欣賞佢栽種嘅心血。

  至於今年蘭花嘅價格,佢話同去年一樣,唔會加價,希望以穩定嘅售價,吸引多啲客人支持咁話喎。

Kelly Chu


hd