Executive日記——美國疫情影響船期 麥記脆薯餅供應緊張

  美國嘅新冠肺炎疫情好嚴重,估唔到影響到美國嘅出口,麥當勞話,來自美國嘅脆薯餅近日因為船期影響而出現供應緊張,所以建議顧客食超值早晨套餐嘅時候,可以選擇免費轉配粒粒粟米杯。呢個消息一出,震撼包括Kelly在內嘅萬千脆薯餅迷,有人話即刻去食番一塊先喎!

  香港麥當勞話,食材一向喺全球搜購,而受疫情影響,全球航運亦受阻延,致令佢哋個別食材供應緊張,其中美國出口船期受影響,所以產自美國嘅脆薯餅供應緊張,但暫時並無缺貨問題。佢哋建議顧客食超值早晨套餐可選擇免費轉配粒粒粟米杯,係為大家點選脆薯餅之外提供多一個彈性嘅選擇咁話。據Kelly八卦到,好彩薯條儲貨充裕,供應不受影響。

        麥當勞又話,會利用全球供應鏈喺世界各地搜購食材,盡量減少對顧客嘅影響,但預計個別食材嘅情況會係未來一段時間仍會持續,如再出現供應緊張,希望大家諒解。

Kelly Chu


hd