Executive日記——10名小天才越級跳考創佳績 港十歲神童英會考奪五科優良

  全球疫情大流行,學校遙距教學,好多家長擔心子女嘅成績,但有十個香港學生創出奇蹟,喺本港參加英國中學公開會考,勇奪超級成績。令人驚奇嘅係,佢哋係小學生或初中生,越級挑戰全球各地嘅哥哥姐姐,其中十歲嘅柯同學,以最小年齡考獲全五科優良成績,佢計劃跳升美國大學攻讀電腦。



  英國中學公開會考,一般係十七歲嘅中五報考,今年就有十名香港學童,由八歲到十五歲,越級跳考呢個公開試,成績超然。最細嘅陳同學,喺數學考獲最高嘅1A*成績,今年讀小三嘅佢,攞到呢個佳績,認真唔簡單。

        另一名十歲嘅柯同學,讀緊小五,考獲2A*、2A、 1B成績,係最小年齡考獲全五科優良成績,佢準備今年三月報考美國SAT,只要通過,就可以唔使讀中學,獲美國大學取錄,跳好多級進入大學。據悉,佢嘅興趣係報讀電腦或理科。

  呢十名神童都喺香港記憶總會報讀課程,利用空餘時間學習,越級跳考英國IGCSE中五公開會考,應考科目包括生物科、物理科、化學科、數學科、附加數科同語文科。學會林老師同Kelly分享,以陳同學及柯同學為例,都係報道天才班,掌握讀書嘅方法,「佢哋識得點樣讀書,學習快咗,開心咗,對成績好有幫助。」林老師話,本地年輕學生喺疫情下奪取佳績,令佢非常開心咁話。

Kelly Chu


hd