Executive日記——港龍空姐變餐廳經理 「貼地」服務闖新天

  國泰航空去年十月大裁員,又停運旗下港龍航空,計劃做空姐做一世嘅Ivy喺嗰日夢碎,但佢無放棄自己,轉去追求另一夢想,成為高級意大利餐廳經理,佢同Kelly講,希望學有所用,將機艙嘅服務經驗「由天空帶到地面」,做個貼地嘅服務業人員。

  Ivy之前係港龍頭等艙務長,佢話估唔到咁大家公司停運,去年十月得知消息嗰陣,忍唔住喊咗。佢話,十五歲嗰陣夢想成為空姐,二○一三年大學畢業加入港龍,服務咗七年,打算做空姐做一世,諗唔到有一日夢碎。

  失業兩個月,Ivy投過五十份簡歷,試過轉行同搵工嘅艱辛,慶幸有屋企人支持,無經濟負擔。直至十二月,喺朋友介紹下,佢入職高級意大利餐廳Crit Room,轉身變做餐廳經理兼宣傳大使。Ivy話,做空姐嗰陣學到嘅,如體貼嘅服務、對咖啡、紅酒嘅認識等,可以喺餐廳大派用場。仲有食客讚過,一睇就知佢以前做過空姐,令佢深信,將機艙嘅服務經驗「由天空帶到地面」係得嘅。Kelly問佢,如果日後有機會,會唔會再做空姐,佢笑住話,其實只要學有所用,做邊行都得。

Kelly Chu


hd