Executive日記——追蹤疫情筍工 月薪三萬六至八萬八

  從事紀律部隊嘅經驗,市場非常搶手。點解Kelly咁講,事關衞生署最近就公開招聘退休紀律部隊人員,職責調查同追蹤疫情,合約為期一年,月薪視乎職級,由三萬六千幾蚊至到最高八萬八千幾蚊,單睇人工已經非常吸引。

  政府早前話,會聘用一百五十名退休嘅紀律部隊人員,加強追蹤確診新冠肺炎患者嘅密切接觸者,有關招聘條件公開咗,引起好多退休警務人員關注,因為人工唔低㗎。好似適合退休警員申請嘅助理調查員,月薪有三萬六千二百二十九蚊;退休警長可申請嘅首席調查助理,月薪四萬六千二百九十五蚊;而退休警署警長可申請嘅助理調查主任,月薪有六萬二千三百四十蚊。

  至於退休督察可申請嘅調查主任,月薪高達八萬八千二百五十蚊。所有職位適合退休離開政府少於五年嘅人士,合約為期一年,每周工作四十四小時。Kelly希望用咁多公帑請呢班調查員,當局真係要提升追查疫情發展嘅能力,令香港快啲擺脫疫情嘅困擾就好。

Kelly Chu


hd