Executive日記——房協用科技加強防疫 屋邨升降機「升呢」 感應撳(車立)乾手淨腳

  一場疫情,推動香港加快使用科技,加強防疫。房協朋友話畀Kelly知,房協將會喺屋邨嘅升降機安裝按鈕自動感應器,減少觸摸掂到病毒嘅風險。

  房協總經理(物業保養)陳偉鳴(見圖)話,按鈕自動感應器已經喺家維邨完成安裝,今季仲會推展至觀塘花園大廈同乙明邨部份樓宇,以及明華大廈(第一期)嘅新重建大樓,預計今年內會為全部屋邨完成安裝,涉二百三十多部升降機。Kelly好支持呢個改裝計劃,以後居民搭升降機就可以唔使用紙巾撳,既乾淨又慳番啲紙,間接支持環保。

  仲有,房協會為單位嘅廁所同廚房地台排水管改裝W型聚水器,由於可以自動補水,解決咗現有U形聚水器有機會乾涸嘅問題,達到阻臭氣帶病毒入屋嘅作用,抵讚!

Kelly Chu


hd