Executive日記——涉打前妻男友下月提堂 柳俊江新正頭好黑仔

  早前傳出鬧離婚嘅無線前主播柳俊江,昨日新正頭去觀塘警署報到時,被落案控以一項襲擊致造成實際身體傷害罪,牛年開咗個唔吉利嘅頭。據Kelly所知,佢因涉嫌去年九月喺觀塘偉業街一間食肆,與妻子雷康怡嘅二十五歲姓朱男友人大打出手被捕;案件會喺下月二日喺觀塘裁判法院提堂。

  Kelly回想,呢位前主播兼KOL自一九年反修例起至今,可謂禍不單行,先後多次惹官非,一九年「七二一」晚上,佢前往西鐵元朗站自發性義載疏散市民期間,喺通往YOHO MALL的天橋被「白衣人」打至血流披面,共縫了十一針。其後傳與妻亮紅燈鬧分居,喺去年九月九日晚,妻子同姓朱男友人在觀塘一食肆飯敍期間,柳俊江突然出現,同男子先口角後扭打一團被捕。至去年十二月二十九日晚上,佢又駕駛私家車途經尖沙咀時疑衝燈與一輛車相撞。計下由前年一直惹官非,都算黑仔。講番尋日件案,同案姓朱男子,警方經徵詢法律意見後,獲無條件釋放。

Kelly Chu


hd