Executive日記——無長途遷徙習性 哄動觀鳥圈 日本鳥種竟港島「出現鳥」?

  香港令人驚喜之處,係人煙稠密嘅民居背後,就可以接近綠色山頭,尤其係港島區,行無幾遠就可以上山,見吓花花草草,走入樹林中吸吓新鮮空氣,雖然野生動物唔多,但就有好多雀鳥,而且仲不時發現新品種,最近觀鳥會就喺港島西區首次發現琉球山椒鳥嘞。Kelly思疑佢由日本移民嚟香港。

  琉球山椒鳥同灰山椒鳥外形相似,但佢胸前明顯有一抹深灰色,之前從未喺香港被發現同記錄。今次觀察到嘅呢一隻琉球山椒鳥,額頭至眉紋呈白色,觀島會判斷佢係一隻雄鳥,而當日佢同灰山椒鳥及暗灰鵑鵙群集喺幾棵小樹間飛躍覓食,逗留咗僅僅數分鐘就走咗。

  琉球山椒鳥係日本特有鳥種,主要分佈喺日本南部至琉球群島一帶,無長途遷徙嘅習性,甚少會飛去日本以外嘅地方過冬。但係,近期福建同廣東相繼發現琉球山椒鳥嘅行蹤,更引起中國大陸嘅觀鳥圈一陣哄動。

  當觀鳥會人員好奇佢會唔會嚟香港,就真係出現鳥!琉球山椒鳥點解突然遷徙到中國東南部一帶度冬?仍然係個謎!

Kelly Chu


hd