Executive日記——舊愛麥明詩fb發炮:請停止污衊女性 林作接戰書 與鍾培生打擂台

  「香港電競之父」鍾培生與從事保險業嘅林作就邊個學邊個,隔空對質,鍾培生仲向林作下戰書打擂台,成為城中熱話。林作呢幾日先喺fb挑釁,到昨午正式宣佈應戰,佢話︰「詳細資料需要和鍾生夾下,請大家稍候。」仲強調「我從未龜縮過。我係林作。打殘鍾培生計劃,由今日開始。」鍾培生喺網絡回應話:「快簽合約,廢話免談」。

  林作喺fb上載一張身穿唐裝嘅相片,見佢拉開衩位,露出一條前腿,同時雙手緊握,做出「敬禮」嘅姿勢,似乎鬥志旺盛。但林作前日曾拍片建議鍾培生,將擂台戰改為辯論賽,又疑似想改為閉門比賽,直至昨先確認出戰。有網民向林作留言指:「龜縮淆底的話,唔該改姓魯(作)」;但亦有網民諷刺話:「溝埋一齊做電競保險啦」、「可能真係傾緊合作,炒新聞」等。

  對於兩人言語間出現侮辱女性字眼,林作前女友麥明詩係FB發文要求佢哋停止污衊女性,又話兩人媽媽「誕下湊大你哋,比你哋更有勇氣」。

  執業大律師陸偉雄同Kelly講,如果雙方嘅「比武」,以正規拳擊比賽形式舉行,有正規擂台、專業拳證等等,就唔屬違法,但強調要同康文署申請,而「比武」場地亦唔可以喺公眾場合,同時唔可以涉及賭博。

  林作早前以半價出售Brioni西裝,話要籌集一百萬元為保險團隊招募人才;剛巧鍾培生近日講過,每年都會花費一百萬回饋會員;林作指責鍾培生「抄襲」,後者隨即下戰書要求打擂台。

Kelly Chu


hd