Executive日記——花生友話埋牙得個講字 鍾培生打擂台合約 林作爽手撕爛

  麥明詩舊愛林作同「百億富三代」鍾培生互相撩打擂台,成為全城嘅花生話題,最新發展係,鍾培生噚日先出招,話送出打擂台賽合約,叫林作「收嘢」,點知曾經係大律師嘅林作就反擊,斥嗰份係爛鬼合約,畀零分,叫鍾培生再做過,火藥味爆燈!

  林作同鍾培生未正式踏上擂台,就激打口水戰,繼林作前日接戰書之後,鐘培生就喺社交平台上載自己跳繩操練嘅相(左圖),仲話除咗生死狀同出場費唔改得,其他條件都可以配合林作,到噚日鍾培生嚟真,晒出工作枱一角,並Tag林作嗌佢「收嘢」,似係已向對方發出擂台賽合約。

  鍾意扭扭擰擰嘅林作,今次好爽手,回覆話已經Print緊出嚟睇,點知一睇佢就爆發,上載嬲嬲相,話:「兩版紙,唔知乜嘢律師寫嘅,中文合約我未簽過,咁嘅垃圾你都Send畀我?」仲即場撕爛份合約(右圖),喺鏡頭前向鍾培生挑機:「親自嚟同我傾過。」

  好多網民睇過呢幕隔空開戰,好多都話得個講字,唔知兩個人口水戰到幾時,一日唔簽約,一日唔知幾時埋牙咁話。

Kelly Chu


hd