Executive日記——口水戰升級 批准上擂台戰鍾培生 阿媽支持林作:打爆佢

  林作同百億富三代鍾培生嘅擂台戰,成為全城花生騷。林作日前公開撕爛鍾培生送上嘅爛鬼拳擊合約後,昨天又出招,今次連阿媽王莉妮都出動,話阿媽不單止批准佢上擂台,阿媽仲鼓勵佢︰「打爆佢。」

  林作昨天又有新搞作,公開媽媽批准佢迎戰嘅片段。林作喺片中話,想打交要過先媽媽嘅一關,鏡頭一轉,就問可不可以打鍾培生?林媽媽說:「打爆他,我一定支持你,打爆他,你一定要爭氣,贏返來。」

  但網民好似唔收貨,紛紛留言,「仲講,即刻上擂台啦!咪鬼縮沙!」、「打交問阿媽,拍拖又使唔使問阿媽?」、「講咁多嘢 究竟想唔想打……冇膽打就好心收下把口啦!」

  另外,林作亦積極備戰,佢跟資深搏擊教練向柏榮拜師學藝,話正聽取師傅意見應如何做起。鍾培生就隔空話,知道林作搵格鬥師傅練武,佢話:「我都問過人,但冇人肯教佢。(點解?)話唔想同佢扯上關係囉。」

Kelly Chu


hd