Executive日記——仁大校監胡鴻烈101歲慶生

  噚日係元宵佳節,亦係樹仁大學校監胡鴻烈博士一百零一歲壽辰,家人同佢喺家中慶祝,教職員和校友亦透過Zoom同佢賀壽。副校監胡懷中透露,去年唔少教職員、校友等提議搞百歲壽辰祝壽會,但胡鴻烈本住低調節約不鋪張原則,謝絕好意。Kelly都祝佢壽比南山!

  胡鴻烈慶祝時顯得非常精神,笑得非常開心,Kelly都戥佢高興。胡懷中向全校發信,指噚日係校監胡鴻烈一百零一歲壽辰,一如往常,一家為校監備上佢最愛食嘅糖醋松子魚,奉上生日蛋糕,團圓慶祝。

樹仁創校50周年

  今年係樹仁五十周年校慶,由胡鴻烈同已故太太鍾期榮一手創立,胡懷中指「十年樹木,百年樹人。」父親胡鴻烈常說:「樹『仁』是一代一代人的事。」教育工作要真正樹「仁」,需要點點滴滴, 一代一代地傳承。既須堅持,亦復創新。喺未來一年,會舉辦一系列校慶活動,重温大學發展成長路。

Kelly Chu


hd