Executive日記——老友撐轉型YouTuber 或講經濟同波馬 名嘴香Sir月尾「掛咪」

  每朝喺新城電台開咪嘅名嘴香樹輝(香Sir),喺呢個月三十一日完成最後一次節目後,就會同聽眾講拜拜。好多朋友知道呢個消息之後,紛紛叫佢「華麗轉身」做YouTuber,仲幫佢搞技術裝置等。香Sir就話,如果自己開咪,會講經濟、波經同馬經喎。

  香樹輝話,由二○○一年一月開始為新城電台做晨早節目,不經不覺二十年,逢周一至周五朝朝早校定鬧鐘四點起牀準備,七點鐘準時開咪,主持財經台節目《香樹輝King King傾》,每朝兩個半小時,話自己年過七十,係時候退休。電台搵邊個做接班人?佢就唔清楚。雖然佢想退休,但好多朋友反而建議佢係時候發展自己嘅網上節目,有人仲教佢喺屋企如何佈置同set鏡頭,好想佢快啲轉型。

  Kelly問香Sir有乜計劃,佢好放輕咁話,唞吓先啦,就算重出江湖,論政唔係佢首選喎,「睇過啲人喺網上論政,嘩!講成個幾鐘,我睇一陣就無時間聽落去啦!」如果日後江湖再見,佢話有銀行界高層鍾意聽佢講波,佢自己又傾向評論吓經濟,講下啲小故事,仲有講馬經都係佢嘅強項,會朝呢幾個方面發展咁話,小妹好期待呀!

Kelly Chu


hd