Executive日記——鍾培生練拳:「阿媽話唔好打死佢」 魔鬼特訓準備「林鍾一戰」 林作認最怕被打下體

  林作同「工廈大王」孫仔鍾培生嘅擂台戰之約,隨著兩人鍛煉備戰,仲要等一段時間先開打,但兩人嘅口水戰一樣咁精采,花生友睇到好開心。林作到拳館接受魔鬼式特訓,佢自爆︰「最怕被打下體!」而鍾培生亦將開始操練,佢透露媽咪叫佢唔好打死林作喎。

  最新一期《東周刊》報道,「林鍾一戰」依然係處於口水戰階段,但好有娛樂性。接下戰書嘅林作,從冇打過交,日前就到灣仔拳館,開始接受至少四個月嘅魔鬼式特訓。現場所見,林作先拉筋再做掌上壓、sit up及拉戰繩等熱身。初時有女友裕美陪操,二人不時打情罵俏,不過,教練一落場,林作認真起來操練。對於拳腳無眼,林作直認最怕傷及「男人最痛」︰「打臉冇所謂,最怕被打下體,最怕下體痛。」驚被拆祠堂?「其實,我冇諗生仔,但唔好影響我雄風。」被記者問及會用咩戰術對付鍾培生?林作搞鬼咁話︰「嘻嘻,我會主攻佢下體。」

  另一邊廂,鍾培生絕不輕敵,佢透露自己已有一年未有做運動,但即將展開史無前例般勤力嘅操練,他坦言︰「我阿媽同我講好擔心,話叫我唔好打死佢,阿媽o依家唸緊佛。」

Kelly Chu


hd