Executive日記——新世界夥港初創公司 研發送餐消毒機械人

  為咗抗擊隻新冠肺炎病毒,除咗靠大家做好個人衞生,仲可以靠新科技。新世界發展有限公司宣佈,投資本港機械人初創公司Rice Robotics,共同研發香港首個集送餐、消毒、巡邏等多功能於一身、K11集團專屬嘅機械人,預計喺今年底面世。新世界亦會向Rice Robotics訂購六十部消毒機械人,稍後將舉辦命名活動,邀請大家為機械人命名。

  「名潮食館」爆疫,K11 MUSEA主動閉館,並出動過Rice Robotics研發嘅消毒機械人,幫手喺全個商場徹底清潔同消毒。其實,Rice Robotics係新世界透過旗下初創孵化器Impact Kommons培育嘅其中一家初創公司,一八年喺香港成立,研發團隊都係香港嘅大學生,團隊平均年齡只有二十七歲。

  呢款專屬K11嘅多功能機械人料今年底面世,除咗具備現時型號嘅送餐、消毒以及巡邏功能外,仲可以跳舞同真人對答,Kelly覺得好過癮,到時同機械人跳番隻舞先。

Kelly Chu


hd