Executive日記——每位最平694元 東瀛遊與快運 下月再推Flycation

  疫情下,全球旅遊業停咗成一年有多,香港兩家航空公司去年先後推出空中飛行體驗(Flycation),令渴望旅遊嘅港人「有得飛」,反應好熱烈,旅行社「東瀛遊」計劃四月添食,同香港快運合作推出「香港飛香港」,呢次Flycation飛行一個半小時,扮去咗日本,三人同行嘅話,每位低至每人六百九十四元。想飛就可以飛。

  東瀛遊喺facebook表示,今次Flycation名為「超期待,再飛日本」主題專機之旅,四月二十五日星期日下午四點出發,乘香港快運航機,由香港飛往香港,航程一個半小時,航班編號為UO6882。同時,東瀛遊會同日本國家旅遊局香港辦事處合作,同旅客喺航上玩遊戲,送出日本主題禮品,包括日本當地精品、零食、手信等,另外亦有旅遊禮劵、酒店住宿等。

  費用方面,兩人同行收費連稅為一千七百八十八元起,即每位平均最低消費八百九十四元;三人同行收費連稅為二千零八十二元起,即每位平均最低消費六百九十四元,價格同去年差唔多。而無論兩人或三人同行,都會安排坐同一排三個相連座位。東瀛遊話,如果反應熱烈,五月繼續舉辦。此外,康泰、縱橫遊等旅行社亦係四月推出本地團,例如塔門、海下灣海岸公園、荔枝莊一日遊,人均只需三百六十九元。康泰就同Kelly講,近日疫情緩和,只要政府重啟本地遊,就可以出團!

Kelly Chu


hd