Executive日記——中大那些年 金管局余總斯文又靚仔

        中文大學好勁,繼校文陳德霖做過金管局總裁,亦係中大人嘅余偉文去年亦出任此職。余偉文接受最新一期《中大校友》訪問,談到自己出身基層家庭,入讀拔萃男書院,跟住考入中大,原本想讀生化系再轉入醫科,但人算不如天算,未能如願,但叻人有無限嘅發展空間,畢業後,佢由銀行見習經理轉去做AO,跟住入咗金管局,佢最終成為香港「央行」嘅行長。

        一心由生化系轉入醫科嘅余偉文,因中大改變政策,無法轉讀,佢毅然轉讀企業管理系。畢業後做過銀行見習經理,受訓時佢以為自己數銀紙嘅功力唔錯,但上班第一個星期,有一日銀行埋數時發現數目唔啱,結果全部人留低重點一次,最後發現係佢計少咗一百蚊!正因呢次疏忽並累及同事「留堂」,佢緊記工作不論大小輕重,絕不能掉以輕心,要盡力做好。其後,佢考到政務官(AO),九一年調任外匯基金管理局,當時佢對金融可謂零認識,但打大鱷一役,令佢好難忘。

  佢當年任職金管局總裁任志剛嘅行政助理,港元受投機者狙擊,港府決定入市,佢憶述從任總身上學到好多嘢,「任生常說『急事慢行』,愈緊張反而愈易失了分寸,即使去到入市最後一日,要動用大量外匯基金來反擊,他全日也氣定神閒;到後來○八年金融危機,我也緊記居安思危的原則,早與同事就各種可能發生的情況擬定好全套應變計劃。」Kelly睇到余總嘅職場生涯故事,十分精采,又望下佢喺中大拍嘅相片,發覺余總當年好斯文又靚仔!

Kelly Chu


hd