Executive日記——香港芭蕾舞團與逸東搞搞新意思 酒店房睇舞台騷夠晒寫意

  住酒店同睇跳舞本來扯不上關係,但疫情令呢兩個元素可以融合一齊。Kelly知道香港芭蕾舞團首次同酒店合作,度身訂造出獨特嘅欣賞模式,就係喺酒店房間俯視下面露天舞台睇騷,好似身處劇院獨立包廂俯瞰舞台,成件事諗落都幾型。

  舞團朋友同Kelly講,今次新表演意念係因為疫情影響表演,而佢哋之前一直有同香港逸東酒店有合作交流,例如喺酒店大堂做一啲表演,今次更搞搞新意思,利用酒店四樓露天平台化身舞台,酒店喺四月二至三日提供限量可觀賞表演嘅房間,訂咗房嘅顧客,隔住玻璃就可以觀賞表演。今次舞團表演《奧菲斯歌舞廳》,由七段芭蕾短作串連而成。

  一晚住宿套票價錢為千幾蚊,包二人自助早餐、一瓶房間葡萄酒,可以慢慢歎寫意觀賞演出,聽講預訂反應都唔錯。

  舞團上次實體騷係去年底喺文化中心演出,希望今次畀觀眾嶄新感受,更期望五月底疫情緩和,可以重新有番正常表演啦。

Kelly Chu


hd