Executive日記——醫管局營養師教整雞蛋甜品 有營又好味

  今個星期日就喺復活節啦,唔知大家會唔會食復活蛋慶祝呢?其實雞蛋營養豐富,一隻中型雞蛋含人體九種必要胺基酸、維他命同礦物質,一般成年人可以每日食一隻。港島西醫院聯網營養部推介咗兩款蛋類甜品食譜,有營好味,Kelly都準備學整啦!

  首先就大家整低脂芝士雲朵多士,要準備兩隻雞蛋、兩片方包、五克低脂芝士、各一茶匙黑胡椒及鹽;先分開蛋白同蛋黃,並將蛋白打至挺身,不規則地放喺方包上,再加上蛋黃同低脂芝士碎;預熱焗爐至攝氏一百八十度,焗六至八分鐘至蛋白呈金黃色就得啦。

  講到蛋類甜品又點少得低卡伯爵茶焦糖燉蛋,先準備五十毫升低脂淡忌廉、一百五十毫升脫脂奶、兩至三個伯爵茶包、兩隻雞蛋及十克糖;將脫脂奶、淡忌廉及茶包用慢火煮滾,攞出茶包後備用;再加入由蛋黃及糖打至淡黃色嘅蛋液,攪拌均勻;將蛋漿過篩倒入碗中,蓋上保鮮紙,用中火隔水蒸十分鐘;喺表面灑上砂糖,用火槍燒至焦糖,就大功告成!

Kelly Chu


hd