Executive日記——團體質疑帶來光害 破壞鄉村環境 荔枝窩豎立LED屏幕搞邊科?

  唔少市民都愛去郊野親親大自然。有團體發現,政府喺荔枝窩村整咗個展示天氣資料嘅LED屏幕,質疑會帶來光害,破壞鄉村環境,成件事冇從遊人角度出發。Kelly覺得政府用意係好,但都要多聽山友意見,以免好心做壞事!

  本土研究社喺facebook專頁話,政府喺荔枝窩協天宮同小瀛學校旁邊、古榕樹對面,豎立咗巨型LED屏幕,「唔講以為自己去咗麥當勞點餐」。佢哋覺得呢個LED屏同四周圍自然環境唔夾,喺遠處已見到屏幕「閃吓閃吓」,揶揄好似「漆黑中嘅螢火蟲,非常出眾」。團體及網民亦質疑儀器日曬雨淋,保養成本一定高。本研社亦喺石澗邊發現兩米高嘅大型指示牌,又係破壞地貌。

  漁護署話,電子屏幕亦有放喺北潭涌同城門,提供當區實時天氣消息,亦會播放宣傳短片,提示山友遵守山系禮儀同防疫措施;強調會遵守叢林法則,黃昏時候會自動關閉,以免影響野生動物。此外,每個LED屏成本約二十三萬元,費用包括設計、生產、安裝同三年保養。

  其實類似爭議事件都發生過,石澳龍脊行山徑上月驚現一座木製「龍爪」雕塑,惹來劣評,唔夠幾日就畀政府拆咗。漁護署解釋屬試驗性質,承認同附近自然環境唔夾。

Kelly Chu


hd