Executive日記——港府「泵水」救旅業 400從業員面試接種中心工作

  過咗復活節長假,昨天驚爆「元朗親友聚會群組」,疫情何時了?Kelly好無奈!旅遊業嘅朋友最慘,無得帶團成年以上,好多人轉咗工,未轉行嘅終於搵到「水泡」,就係政府「泵水」一億五千多萬元打救旅遊業,畀導遊領隊、旅巴司機、旅行社及酒店職員四類從業員到二十四間社區疫苗接種中心工作,昨天開始登記,一個早上就有四百人去咗申請,反應算唔錯。

  按港府安排,旅業人士可以申請社區疫苗接種中心嘅管理運作同行政支援工作,共二千個職位,為期五個月。其中登記員一職,由昨天至明天喺尖沙咀金域假日酒店面試,獲聘者將於下周一前獲得通知。

  旅遊業疫苗中心行政支援計劃秘書胡景豪話,昨早面見咗四百名申請人,運作尚算順利。申請人到場後,會按所選嘅疫苗接種中心劃分面試組別,面試除了自我介紹,亦會問及工作經驗、面對突發情況如何應變等,面試員會視乎回答作評分。

  有應徵者認為政府嘅支援來得遲,不少行家轉咗行,直言今次職位「僧多粥少、競爭大」,有啲擔心。Kelly為大家打氣,要能屈能伸,逆境求存,加油!

Kelly Chu


hd