Executive日記——褚簡寧減工作享受人生 續獨家為《頭條》寫專欄

        資深傳媒人褚簡寧(Michael Chugani)曾任英文報章嘅老總,近年以評論員同專欄作家身份,成為跨媒體嘅KOL,好受歡迎。但佢同Kelly講,工作多年,覺得burnt out(好攰好攰咁解),想休息吓,所以一次過決定停止為電視做訪談節目,亦不再為一英一中報章寫專欄,但佢知好多讀者喜歡佢以新聞教英文,所以會繼續獨家為《頭條日報》撰寫《又中又英》專欄。

        褚簡寧係Kelly好朋友,相識多年,佢昨天通知小妹,話係時候畀多啲時間自己,所以佢昨晚主持完無線明珠台嘅Straight Talk節目之後,就會同電視觀眾告別,而喺無線嘅講新聞學英文小環節亦停止。同一時間,佢喺《信報》同《南華早報》嘅專欄亦與讀者說聲再見。不過,佢知道《頭條》讀者眾多,大家又鍾意跟佢一邊睇時事一邊學英文,所以佢會繼續為《頭條》撰寫《又中又英》專欄。小妹知道呢個專欄受歡迎程度好高,o依家只係《頭條》睇到,大家逢周二及周四留意啦!

  褚簡寧話,佢減少工作後,會多啲行山,又想追番好多Netflix嘅劇集,仲有佢一直無時間學煮食,將會試吓下廚,仲話自己單身,如果遇上有女士想試吓佢嘅菜式,或者佢覺得有緣,話唔定會追求下。

Kelly Chu


hd