Executive日記——姜B等星級啦啦隊同DSE生打氣!

  中學文憑試噚日開考,Kelly知道「星島教育」網頁及fb邀請咗近期熱爆嘅組合MIRROR成員姜濤,同多位歌手及演員,特地拍短片為DSE考生打氣,鼓勵大家努力應考,但條條大路通羅馬,平常心便可,唔好畀自己太大壓力。

  姜濤話希望考生一齊努力,繼續加油。歌手林家謙希望考生盡力並以平常心應考,不必太在意結果,「結果就會比預期中好」。許廷鏗則勉勵考生做好本份,完成眼前工作。林奕匡亦提醒同學唔好畀自己太大壓力,盡力溫習,結果唔係最重要。

  女歌手Serrini呼籲考生努力讀書,唔好太沉迷用Instagram。林二汶認為人生有好多有趣嘅事,盡力考好DSE,亦要開開心心生活。藝人湯洛雯就鼓勵同學努力讀書,爭取好成績。

  ERROR鼓勵考生努力備試,但唔好太睇重成績,因為條條大路通羅馬,即使最終考得未如理想,亦唔需要太灰心,成員梁業(肥仔)仲話當年自己亦唔係成績優異,但目前亦算得上略有成就。Kelly相信考生都會聽偶像鼓勵,立即掃QR Code睇吓啦! 。

Kelly Chu


hd